मोदींची मिठी डोळ्यात खुपणाऱ्यांसाठी एक खुलं पत्र

मी मोदी भक्त नाही. तरीही मोदींनी इस्रो प्रमुखांना जवळ घेऊन मारलेली मिठी अनेकांना खुपली त्यावर काहीनी जावईशोध लावले. वर इस्रोच्या प्रमुखांना हे शोभत नाही, पदाला साजेसं राहावं अशा शहाणपणाचे डोस अनेकांनी फेसबुकवरुन त्यांना पाजले. त्याही उप्पर जाऊन अमेरीकेत मोहिमा अयशस्वी झाल्यावर नासा प्रमुख रडत नाही अशी थुकरट उदाहरण ही देऊन झाली आणि अनेक अंधळ्या मोदी द्वेषींनी हेच सडके विचार सरसकट शेअर केले.

    मोदींच्या धोरणांना, विचारधारेला विरोध करणं हे सशक्त लोकशाहीच्या जिवीताचं लक्षण आहे पण म्हणून सरसकट उचलली जीभ लावली टाळ्याला असं करुन स्वताचं हसं करुन घेण्यात कसली आली धन्यता?
    मोदी इस्रोच्या कार्यालयात मोदी कुटुंबियांचे किंवा भाजपचे प्रतिनिधी म्हणून गेले नव्हते. ते देशवासियांचे प्रतिनिधी म्हणून गेले होते हे लक्षात ठेवणं गरजेचं आहे. मोहिम अयशस्वी झाल्यानंतर आपण सगळे हिरमुसलो पण प्रत्येकाला त्या शास्त्रज्ञांबद्दल अभिमान वाटला, मला सांगा कोणाला अभिमान नाही वाटला?  मग जर मोदींनी तिथे जाऊन त्यांना मिठी मारली, त्यांचे अश्रु पुसले, त्यांना धीर दिला तर तर काय चुकलं ? तुम्ही जर तिथे असता आणि तर तुम्ही काय केलं असतं?
    आपल्या देशाला एक संस्कृती आहे, आणि संस्कृती जपणाऱ्या प्रत्येकाला संवेदना असतात. (ज्या देशांना संस्कृती नाही त्यांची प्रकृती कशी आहे हे वेगळं सांगायला नको) त्याच संवेदनातून इस्रोप्रमुखांना अश्रू अनावर झाले त्यांचे डोळे पुसण्याचं काम मोदींनी केलं तर काय बिघडलं? ज्यामोहिमेवर दिवसरात्र काम केलं ती अयशस्वी झाली तर रडू येणार नाही तर हसू येईल का?
    नासाप्रमुख मोहीमा अयशस्वी झाल्यावर अमेरिकेच्या राष्ट्राध्यक्षांच्या गळ्यात पडून रडल्याच्या चित्रफीती पाहिल्या नाही असा दावा काही मुर्खांनी केला, त्यांना मला एकच सांगायचंय, लांगुलचालनेला काही मर्यादा असतात. परकीय चाटूगिरी बंद करा. बापाचं नाव मुलांना आई सांगू शकत नाही अशा देशांचे अनुकरण करायचे? त्यांनी केलं तेच जर आम्ही करायचे असं इस्रोनं ठरवलं असतं तर चंद्राच्या दक्षिण पृष्ठभागावर आपण पोहचू शकलो नसतो.
इस्रो प्रमुखांना अक्कल शिकवणाऱ्यांनां कागदाचं विमान तरी उडवता येतं का?

    भाजप-मोदी-सत्ताधारी यांना विरोध करुच की, त्यासाठी नोटाबंदी, आर्थिकमंदी,जीएसटी यासारखे अनेक विषय आहेतच की, यावरुन सत्ताधाऱ्यांवर टिका करण्यासाठी  अख्खं आयुष्य पडलंय, पण त्यासाठी वेळ महत्वाची याचं भान असलंच पाहिजे.

बरं, हे वाचत असतांना मी पण भक्त झालो की काय असं वाटत असेल तर खुशाल वाटू द्या. मोदीभक्तांनी मला किती शिव्या घातल्या हे त्यांना आणि मला चांगलं माहित आहे त्यामुळे मी वेगळं स्पष्टीकरण देणार नाही.

आपला
स्नेहिल शिवाजी